Rev 16 | ATA | STEP | Eni emaisou aloxo ne mukalu, la elomusou 'ava vile tatila molu no taasou lalotu noxou Lataua mu'ava muatu noxi'a ta angelo muxatele tamei ne aloxo 'o, “Ngalai mo nganixi'u tavulu muxatele tamei sou la'ia masua manina noxou Lataua ne ulu'e lai no lia.”

a 16:2Mul 9:10; Pal 13:12-17

b 16:3-4Mul 7:17-21

c 16:7Lex 19:9; Pal 15:3

d 16:9Pal 9:20-21

e 16:10Mul 10:22; Ais 8:21-22

f 16:12Ais 11:15

g 16:14Pal 19:19

h 16:15Mat 24:43-44; Pal 3:3

i 16:16Sek 12:11

k 16:18Pal 4:5, 8:5

l 16:19Pal 14:10

m 16:20Pal 6:14

n 16:21Mul 9:23-24; Pal 11:19

Revelation of John 16

Tavulu sou La'ia Masua Manina Noxou Lataua Muxatele Tamei

1 Eni emaisou aloxo ne mukalu, la elomusou 'ava vile tatila molu no taasou lalotu noxou Lataua mu'ava muatu noxi'a ta angelo muxatele tamei ne aloxo 'o, “Ngalai mo nganixi'u tavulu muxatele tamei sou la'ia masua manina noxou Lataua ne ulu'e lai no lia.” 2 ^aAne'i ta angelo ne milomu aloxo ne mukalu, la angelo ane muuli mulai munixi'u tavulu noxou no anu latotope ne mulai no lia. Anu munixi'u tavulu ne mulu'e la xalevi toxotoxoxa'a ilou navunavu sou toxotoxoxa'a muxali no vasime'a ta mitema e mino'u sosovo noxou mii vova ne xe milotu no anu mii e mipuinu iou loxo mii vova ne. 3 ^bIoxe angelo ta tameisou muavuti la mulai munixi'u tavulu noxou ne no luaki. La luaki muxiu muxali sialu. Sialu ne loxo ivau itema usoli la sialuxu, la mu'oxone'i ta mimii iouiou e mixolu no luaki tanu ne misoisoli mukalusi. 4 Xe angelo tatalusou ne munixi'u tavulu noxou mulu'e no lexa xe no pupupulu sou lexa ne la muxiu muxali sialu mukalusi. 5 Xe eni elomusou angelo e musaxila'u lexalexa ne muvikala aloxo 'o,

“Lataua nini nexolu vaimomo 'o mo nexolu tei.
Nini nexolu va'axu no anu 'ili'ilixo masumasua
mo natulusi'a ta mitema no anu vaivaikala la nini na'oxonu 'ilixo ulapu.
Xo nini nevikala la ane'i itulu no anu vaivaikala loxo nini nelemolu ne.
6 Xo ane'i mive'ave'a ta mitema ilo'a ta mitema sou palomatana noxine misoisoli.
La sou nini nelosi'a sialu sou iiexu mumomomo sou 'ilixo ma'ia ane'i mi'oxonu.”
7 ^cMo elomu la, la elomusou 'ava molu no anu valovalo muatu kalumo aloxo 'o,

“Manina, Tila Lataua anu xaviinu musuku misevile,
nini nevikala lexe natulusi'a ta mitema no anu vaivaikala
la nini na'oxonu manina sou vaikalameni la na'oxo 'ilixo ulapu
la natulusi'a no anu vaivaikala.”
8 Xe angelo tami'asou mulai munixi'u tavulu noxou no aso iou, sou u'oxonu aso uiei xaviinu la uieisi'a ta mitema loxo navu. 9 ^dXo no anu aso ialuxu e uto'ito'isi'a ta mitema ne la ane'i ivivikala masumasua no ualasou Lataua. Anu Lataua ne Anusisi xavi sou usaxila'u tu'utu'umaxu ne, la ane'i ixiunu opone'i mo i'itinu ualasou uasi.

10 ^eXe angelo ta'uvesou mulai la munixi'u tavulu noxou no anu puloulou noxou mii vova e muxali muatu no luaki ne la tuala e anu musaxila'u ne isivoxo mutomu. Xe mu'oxone'i ta mitema mixolu ne mixamulinu navunavu toxoxa'a la mingangasou levexa'a. 11 Mo mino'u navunavu ilou xalevi toxotoxoxa'a la imasaxa ixiunu opone'i no anu 'ili'ilixo masumasua noxi'a e mi'oxonu ne uasi. Ia ivikala masumasua noxou Lataua sou teitexi.

12 ^fXe angelo muxatele vilesou munixi'u tavulu noxou no lexa tila ne Iupulatesi. Anu munixi'u la mu'oxonu lexa tatila ne musii sou ulalaxiinu vote'isi'a ta tatanaanu tuala no aso uxali sou ine'e. 13 Mo eni emalei la emaisi'a ta uleenu ta masumasua tatalu ie'i loxo ta va'e milaa muatu. Vile mulaa muatu no anaxu iaulu toxoxa'a ne mo vile mulaa no anaxu mii vova ne xe vile mulaa muatu no anaxu itema sou palomatana kalakalavoi ne. 14 ^gAne'i ta uleenu masumasua manina ne ilavusou i'oxonu sosovo se'i uxali. La sou ilai itaxusi'a ta tatanaanu tuatuala no xalexalee lia ukalusi mo ine'e ipita sou i'oto no anu voxo tatila noxou Lataua e xavi musuku. 15 ^h“La sou ngalomu laixe, eni ane'e loxo itema sou pakali. Anu ane uxolu ulalaxii mo ulosou tokolomou laixe la anu u'osa xo Lataua ualusou. Xo umomomo sou anu umuamua'i pangapanga'u mo umaela no ie'i ta mitema uasi.” 16 ⁱLa sou ane'i ta uleenu ta masumasua ne milai mipitane'i ta tatanaanu tuatuala ne no xaleenu lia vile ilemolu no anu vaikala noxi'a ta Evalaio lexe Aamaxetoni. ^{▼▼16:16Aamaxetoni ne ilemolu no anu vaikala ngiala la lexe Armagedon.}

17 Xe angelo muxatele tameisou muavuti la mulai munixi'u tavulu noxou mutelo teitexi no va'a vitanisi. Xe no nano no taasou lalotu noxou Lataua, la vaikala vile mu'ava ta tatila muatu no puloulou noxou Lataua aloxo. “Anu a mukalu.” 18 ^kLa lele'e lamixu mukelekelele mo luluxu muvalivalixumu xe laliua mukunikuni toxoxa'a manina. Laliua ne toxoxa'a manina xo no mine ta mitema mixolu no lia 'o la laliua vile toxoxa'a aloxo ne uxali uasi ia ane 'o ne tatila e tatila manina. 19 ^lLaliua toxoxa'a ne mukuni la tuala tatila ne Vaviloni muse'ise'i muxali alelaxu tatalu. Mo tuala tatila no xalexalee tuatuala no lia 'o mumamumamulo mukalusi. Lataua muxavutalane'i tuala tatila ne Vaviloni no 'ili'ilixo noxi'a la mu'oxone'i miiexu paku sou uaini noxou. Paku sou uaini e ane miiexu ne mu'ana'ana no anu la'ia masua manina noxou Lataua. 20 ^mLaliua ne mukuni la mu'oxonu la'ola'olu no luaki ne tasiauxu mo laxalaxa'ilu ne tasiauxu ia uxolu la uasi. 21 ⁿXe mu'oxonu la'iua tava'u toxotoxoxa'a loxo aesi lavo'o molu teitexi no loxotolo mulu'e noxi'a ta mitema. La'iua e tava'u toxotoxoxa'a loxo lavo'o ne tu'umaxu mumomomo loxo kiloxelemu itemaxu ta tamei mo ta'uve (45kg). Xo anu mu'oxonu la'iua tava'u loxo lavo'o ne mulu'e mu'oxo masuane'i manina la sou ane'i mivivikala sou Lataua masumasua.